كانت
المذيعة تجلس في سيارة التليفزيون ، تعدل من هندامها وتضع أطنانا من أدوات
المكياج على وجهها ، الذي أستحال إلى ما يشبه وجه البيلياتشو ..
ألتفتت في نعومة ودلال إلى المصور ، وقالت في رقة :
- إيه رأيك في شكلي ؟
شهق المصور من الفزع وهو يرى وجهها ، ثم قال :
- يا نهار بني فاتح .. إيه ده ؟
ثم شعر بالرعب أكثر من نظراتها النارية ، فقال وهو يحاول الأبتسام :
- قمر يا خواتي قمر ..
أبتسمت المذيعة إبتسامة مرعبة ، وهي تقول :
- طيب يلا علشان نصور البرنامج ( حوار مع آدم )
ظلا
يسيران بحثا عن آدم هذا لينتهيا من البرنامج سريعا ، ولحسن حظها وجدت مقهى
شعبي مليئا بأشكال وأنواع من الرجال ، فأنتقت أحدهما وأقتربت منه ، ثم
وجهت المايك نحو عينه ( قصدي فمه ) وقالت في سرعة : تحب تصور معانا برنامج
تليفزيوني ؟
الرجل: برنامج عن إيه ؟ السيرك القومي ؟
المذيعة : لا ده حوار مع آدم .. الرجل يعني هنسئلك شوية أسئلة سريعة وتجاوب إجابة مختصرة .. بالبلدي تجاوب بالمختصر المفيد ..
الرجل : أوكيشن ..
المذيعة : ما هي هواياتك ؟
الرجل : التدخين ، ولعب الطاولة ..
المذيعة : شغل حضرتك إيه ؟
الرجل : عامل نظافة ..
المذيعة : مؤهلك الدراسي ؟
الرجل : بكالوريوس أقتصاد وعلوم سياسية ..
المذيعة : يا حضرت البرنامج ده مش كوميدي .. قول بجد مؤهلك إيه؟
الرجل: والله العظيم خريج أقتصاد وعلوم سياسية ..
المذيعة : غريبة .. طيب ليه بتشتغل عامل نظافة ؟!
الرجل : يعني شايفة الشغل مقطع بعضه ، البلد كلها بطالة الله يخرب بيت الـ....................... ( عبارة محذوفة )
المذيعة : متجوز ؟
الرجل: آه متجوز الفقر
المذيعة : إيه أكتر أمنية نفسك تتحقق ؟
الرجل : نفسي أقف في طابور العيش ساعة ونص بس ..
المذيعة : إيه رأيك في إنجازات الدولة هذا القرن ؟
الرجل: بصراحة إنجازات جميلة ، بالذات الكوبري الجديد ده بتاع مدينة نصر ، وكمان نفق الأزهر ..
المذيعة : بقول لك إنجازات .. تقول لي نفق وكباري ..
الرجل : هو فيه إنجازات غيرها ؟ آه يمكن قصدك كوبري المحور بس ده خلاص قدم ..
المذيعة : طيب شايف في البلد فيه نوع من الفساد ؟
الرجل : أكيد فيه طبعا .. محمد أبو تريكه..
المذيعة : مش فاهمة .. تقصد محمد أبو تريكه فاسد ؟
الرجل: فاسد إيه يا ست .. قصدي هو الوحيد اللي بحس أنه أبن حلال
المذيعة : مش فاهمة دخله إيه بسؤالي عن الفساد ؟
الرجل:
قصدي يعني البلد كلها فساد ، وكلهم ولاد........... ( عبارة محذوفة ) ده
حتى الوزيـ............ إبن الـ...... وكمان حسـ............ والراجل ده
بتاع ام نبيل .. الوحيد اللي حاسس أنه من أصل طيب وأبن حلال هو أبو تريكة
..
المذيعة : تحب تضيف حاجة تانية
الرجل: لا .. لو عاوزة تسألي اسألي
المذيعة : لا شكرا سلامو عليكو ..
الرجل : وعليكو السلا...........
لم
يتم الرجل عبارته .. لهجوم عدد كبير من الرجال بالملابس الرسمية .. وسط
ضربات وركلات وجذب .. ثم تم ألقائه داخل سيارة سوداء.. ورجل تبدو عليه
سمات الشراسة يقول :
- ده أنت هتتعلق يا ....... أمك ( عبارة محذوفة )
استر يا رب
&& 
